Депутаты
Мәслихат хатшысы Шарбақты ауданына сапар шекті
13-04-2018 09:54
Мәслихат хатшысы Шарбақты ауданына сапар шекті

2018 жылдың 12 сәуірінде Павлодар облыстық мәслихатының хатшысы Бақыт Бексейітова  жұмыс сапарымен Шарбақты ауданында болды. Сапар барысында ауданның экологиялық жағдайы, қатты қалдықтарды жою,  2017 жылы жөндеуден өткізілген автожолдардың жағдайының  мәселелері қаралды.

Қонақтарға аудан мәслихатының хатшысы Светлана Шпехт, аудан әкімінің орынбасары Талғат Бегімов, тұрғын үй-коммуналдық  шаруашылық, жолаушылар тасымалы және автомобильдер жолдары бөлімінің басшысы Маргарита Темнохуд жолсерік болып, таныстырып отырды.

Облыстық маңыздағы Чернорецк-Ольгино-Успенка-Шарбақты автомобиль жолында екі жылдық қайта жөндеу жұмыстары жүргізілуде. 2017 жылы жолдың 110-119 ш бөлігінде күрделі жөндеу болды.  Мердігер – «ПКФ Гордорстрой» ЖШС-гі. Жолдың 130-137, 144-149 ш  бөлімдерінде орташа жөндеу жүзеге асырылды. Мердігер - «Дорстрой» ЖШС-гі. Ағымдағы жөндеу жұмыстарын аудан орталығының Амангелді, Әбенов, Чкалов көшелерінде «Шығыс Жолдары» ЖШС-гі орындады. Жұмыстардың сапасын қарап шыққаннан соң, облыстық мәслихат хатшысы тарапынан ескертулер  мен сындар туындаған жоқ.

Мұнан соң Бақыт Бексейітова аудан әкімі Б. Ибраевтың төрағашылығымен өткен жиналысқа қатысты. Оған азаматтардың құқықтары  мен  заңды мүдделерін қамтамасыз ету жөніндегі облыстық  мәслихаттың  тұрақты комиссиясының төрағасы Александр Поляков, облыс табиғатты қорғау прокуроры Даурен Кенбаев, облыс  экология департаментінің басшысы Жомарт Кәрімов, облыс  жер қойнауын пайдалану, қоршаған орта және су ресурстары басқармасының басшысы Қадылжан Сатиев, аудандық мәслихаттың хатшысы және депутаттары, мемлекеттік мекемелер, ұйымдар мен кәсіпорындардың басшылары, округ әкімдері қатысты.

Күн тәртібінде 3 мәселе қаралды. Бірінші мәселе – қатты қалдықтарды орналастыру объектілеріне қойылатын негізгі экологиялық талаптар. Баяндаушы – Жомарт Кәримов. Екінші мәселе – Шарбақты ауданының қатты қалдықтар полигонының қазіргі жағдайы  бойынша Қадылжан Сатиев мәлімет берді. Үшінші мәселе – қатты қалдықтарды жою бағытында Шарбақты ауданы әкімдігінің атқарған жұмыстары жөнінде Талғат Бегімов ақпарат берді.

Баяндамалардан соң қатысушылар күн тәртібіндегі мәселелерді кең талқылады.

Жиналыс соңында Бақыт Бексейітова 2019 жылдың 1 қаңтарынан бастап тұрмыстық қалдықтарды заң негізінде бөлек жинау қажет екендігін ескертіп өтті. Ол үшін әрбір селолық округ қатты қалдықтарды жою  ету бойынша іс-шаралар жоспарын жасауы қажет. Полигондарда қоршаулап, пресстерді орнату үшін электр желісін өткізу керек. Аудандық мәслихаттың хатшысы, депутаттары жиналыстың күн тәртібіндегі сұрақты ғана емес, ауданның көгалдандыру, автожолдардың сапасы мәселелерін де  бақылауға алғаны жөн, екендігін айтып өтті.

Жиналыс соңында аудан әкімі Б. Ибраев қонақтарға алғысын білдіріп, табыстар мен жеңістер тіледі.